娛壹
2024年1月4日
音樂製作人Carl叔叔王雙駿首個個人作品展：《王雙駿 HATS ON 音樂會 While the Music Lasts》將於3月9日假會展Hall 5BC舉行，邀得多位歌手會上獻聲，包括 #謝霆鋒 、Juno #麥浚龍 、 #柳應廷 、 #李駿傑 、 #吳林峰 及& The Duo Band等。 #今次音樂會不設公開發售及內部認購 ，門票換領詳情主辦日內公佈。
【謝霆鋒年少輕狂「係個好刺激嘅人」】
Carl叔叔92年開始出任唱片監製，「While the Music Lasts」只要仍然有音樂，我們便能繼續跳舞。音樂會演出陣容，從識於微時合作無間的老朋友到新生代都有，老朋友如謝霆鋒，Carl叔叔說：「我識霆鋒時佢得19歲，係個好刺激嘅人，完全唔理世俗眼光，聽眾會感受到好多熱血嘅火花。睇住謝霆鋒由年少輕狂，慢慢發展出一種穩重，成為一個好全面嘅藝人。」
【與Juno鬥天馬行空受& The Duo Band影響改變想法】
「識Juno嗰陣，佢得十幾歲，咁多年嚟我哋傾偈嘅方式，十句入面有八句都係『廢話』，但係呢啲默契會成為創作概念，我哋鬥天馬行空、鬥不著邊際，所以每首歌都會有唔同嘅驚喜。」
Carl叔叔續說：「& The Duo Band嘅合作，唔止改變咗我嘅音樂生涯，甚至影響我成個人生。我學識咗，好多時唔需要諗太多，玩咗先，令自己開心就夠，我哋有好多回憶，啟發我好深。」
【新生代：吳林峰、JERS】
新生代代表有JERS（Jer柳應廷及Jeremy李駿傑）和吳林峰。 Carl叔謂：「 #吳林峰 表面好好笑容冇乜殺傷力，好多人可能都會忽略咗佢深情同感性嗰面。每次佢嚟錄音前都做咗好多功課，所以好快進入狀態。我特別欣賞佢vocal嘅感情傳遞，非常細緻，好希望大家可以多加留意；佢對音樂、創作嘅熱血，我係完全感受到！呢個人仲有排玩，必定可以去到更高嘅成就。」
輪到JERS，先談Jeremy：「最初收到邀請幫Jeremy（ #李駿傑 ）造歌嗰陣係特別興奮，好欣慰佢終於有呢個機會，因為香港樂壇好耐冇出現過呢種質地嘅藝人。佢好知道自己想要咩，對監製嚟講係一件好幸福嘅事，Jeremy係其中一個我比較偏心嘅。」
「 Jer（ #柳應廷 ）就好似航行大海嘅水手，只會向前，永遠見唔到佢向後行，佢唔會隨風而擺，好知道自己希望呈現嘅音樂係咩樣，同佢加埋小克創作嗰幾個系列，係我近年玩得最複雜但又最起勁嘅音樂企劃。」
【從Mood board尋找柳應廷的聲音】
Carl叔叔之前在一些訪問中，曾分享與柳的相處方式。跟Juno是鬥講廢話，柳呢？用照片。Carl叔謂柳有很多想法，「佢未必識講出嚟，好多時會send幾十幅相出嚟，好似mood board咁，由呢幾十幅相去探討佢入面個世界究竟係點。」
「克牛柳」（小克、Carl叔、柳）都是比較「抽象」的人，彼此inspire，從柳的mood board 慢慢塑造作品的聲音面貌。 #物語系列 緣自一幅黑白照，相中人在水中掙扎，頂頭有一度光穿透水底。相片由柳提供，那是他聽完《 #水刑物語 》demo後浮現腦海的畫面，故事從這裡開始。
Carl叔怕悶，喜歡玩，編曲上有些巧思，如作品之間暗埋伏線，甚至用上頂真法，「例如《狂人日記》最尾幾粒字要連去《砂之器》頭幾粒字，《砂之器》最尾幾粒字又要連去《人類群星閃耀時》頭幾首字，音樂上都係咁樣『拖住手』去做。」
【編曲、監製的角色】
Carl叔形容監製就像建築師，為歌手度身訂造不同音樂計劃；也像母親，從有限家用（budget）令全家人有飽飯食。彼此關係也像跳tango，互相學習。監製為歌手尋找signature聲音，編曲就是costume、佈景，「將嗰場戲成個氛圍、色tone做出嚟，帶大家去嗰個地方、嗰個畫面，其實係好緊要。如果唔係，大家聽清唱就算啦！（笑）」
編曲和監製一向予人比較「隱形」、有距離感，近年不少唱作人包辦曲詞編監角色，帶動樂迷主動認識了解每個崗位、musician，甚至不同班底組合風格。好事。
【音樂沒有absolute answer 無對錯之分】
從唱片走到單曲時代，樂壇沒死，新血還不斷湧現，Carl叔叔謂近這兩三年給了他不少驚喜：Gareth. T、Serrini、Tyson Yoshi、林家謙，沒大公司背景，沒包袱，做自己喜歡的音樂，發出屬於自己的聲音。他見證過樂壇從百花齊放敢玩敢創新的八十年代，到後來轉打穩陣牌，多了計算，「大家開始越做越保守，做嘅音樂越嚟越穩陣。穩陣係好好聽，但其實悶囉，玩音樂大忌。」
玩音樂就像一場冒險，要有刺激好玩，才撞到新嘢；音樂也沒有absolute answer，沒有對錯之分。「唔會話，我聽一首歌，會覺得佢啱定係錯，你只會係，『呢首歌我鍾意』，『呢首歌我唔鍾意』，好聽或唔好聽，好個人，所以計（算）咩呢？其實冇嘢好計。」