晴報 SkyPost
2023年3月11日
MIRROR成員柳應廷（Jer）推出新歌《從零開始的新世界》，有別以往沉重暗黑的風格，今次迎來輕鬆歡愉的慶典式歌曲。Jer坦言演唱會事件後，他需要透過健身分散注意力，避免沉醉在情緒低谷，作為MIRROR的開心果之一，他笑嘲姜濤和盧瀚霆（Anson Lo）有偶包，連笑都不敢笑，以歌曲寄語大家：「都市人放鬆啲啦！」
Jer今次首次親自作曲，炮製心願名單中的「唱山歌」，無論是歌曲的旋律或是MV呈現的畫面都是充滿歡愉，「呢首歌好想分享快樂，想大家朝早返工前播一播首歌醒醒神，畀個力量大家，紓緩一下壓力。呢首歌係比較少見嘅廣東歌曲風，感覺係一份成就解鎖，因為由《狂人日記》開始我就不斷挑戰唔同曲風，繼續做到自己喜歡嘅歌，感覺好正！」他笑言這首歌希望獲得迪士尼賞識，成為慶典歌曲，亦為他開拓小朋友的市場，誓增兒童界的「柳柳粉」。
（《晴報》陳健珊攝影）
Jer稱自己沒有面向，因為性格貪玩不應該活在規限之中，曾怕在團隊中跳舞的他經歷4年的訓練後，今次排舞一星期就已經應付有餘，他笑言：「嚟緊會勁過Anson Lo，我要挑戰佢！」而他近來IG分享頻頻健身，是否要挑戰做大隻仔？他解釋：「做Gym係因為演唱會事件之後，我畀自己一個專注...運動可以令自己分散注意力，一星期做三次，做落又幾好，所以鍛煉身體做下運動，可以令身心都放下一啲嘢！（肌肉見得人未？）我從來做Gym冇諗過見人，我相信粉絲唔想透過睇我身材而滿足，音樂上有好多滿足大家嘅地方。」
阿Jer坦言自己希望將樂觀的力量影響MIRROR的隊友，尤其是當以偶像團體自居的時候，經常不自覺地背負上一些包袱，「佢哋覺得偶像好多嘢唔做得，框死自己要點點點，甚至佢哋唔敢笑！我覺得某程度上，大家鍾意我哋就係來自一個真人騷，鍾意笑、鍾意喊、鍾意嬲、鍾意唔開心...乜都真嘅人，我想佢哋記得番最真嘅自己同相處最舒服嘅自己。佢哋鏡頭前唔敢笑呀，驚核突喎，笑都要遮住個嘴，（最憂鬱係邊個？）姜濤同Anson Lo偶像包袱比較重，我同Edan（呂爵安）鏡頭前面完全核突開心笑都冇問題，佢哋應該都要咁啦！」
Jer過往推出多首單曲，他坦言儲夠數已經足以能夠推出專輯和舉辦個人演唱會，希望今年可以成事，讓「柳柳粉」們能夠透過舞台可以感受到他腦裡的幻想世界。
髮型：Man Chan @CHIC Private I salon
化妝：Rainbow Chung、Yumi Cheung @Annie G. Chan Makeup Centre
服裝：Issey Miyake, BOTH
場地：HERE Studio